Sunday, February 16, 2014

'ಪ್ರೀತಿ-ಮನೆ'



ಬಾಗಿಲು ತುಂಬಾ,

ನಾವು ಬರೆದ ಸ್ಸಾರಿ,ಥ್ಯಾಂಕ್ಯು ನೋಟ್ ಗಳು!

ಗೋಡೆಯ ತುಂಬಾ,

ನಮ್ಮ ೧೪೩ ಬರಹಗಳು.......!!!!




ಅಡುಗೆ ಮನೆಯಲ್ಲಿ ,

ನಾ ನಿನಗಾಗಿ ಮಾಡಿಟ್ಟ ಸಿಹಿ ತಿನಿಸುಗಳು!

ಫ್ರಿಜ್ ತುಂಬೆಲ್ಲ,

ನೀ ಸರ್ಪ್ರೈಸಾಗಿ ತಂದಿಟ್ಟ ಚಾಕಲೇಟುಗಳು..!!






ಟೇಬಲ್ ತುಂಬಾ ,

ನಾ ನಿನಗಾಗಿ ಬರೆದಿಟ್ಟ ಪ್ರೇಮಕಾವ್ಯಗಳು!

ಕಪಾಟು ತುಂಬಾ,

ನೀ ನನಗಾಗಿ ಬರೆದ ಲವ್-ಲೆಟ್ಟರಗಳು...!!










ನಮ್ಮ ಪುಟ್ಟ ಲೈಬ್ರರಿಯೊಳು,

ಪುಸ್ತಕದ ತುಂಬೆಲ್ಲ,

ನೀ ಗೀಚಿದ ನನ್ನ ಹೆಸರುಗಳು!

ಮುತ್ತಿಟ್ಟ ನನ್ನ ತುಟಿಯಚ್ಚುಗಳು..!!

 


ದೇವರ ಮನೆಯಲ್ಲಿ,

ನಿನ್ನ ಮುದ್ದು ಅಕ್ಷರದಿ ಬರೆದ

ಭಜನೆಯ ಪುಟಗಳು!

ಗುಲಾಬಿ! ಮುಡಿದ ದೇವರ ಫೋಟೋಗಳು..!!




ಅಂಗಳದ ತುಂಬೆಲ್ಲ,

ಪ್ರೀತಿಯ ರಂಗೋಲೆ ಮೂಡಿಹುದು!

ಪ್ರೀತಿ ದಿನದಿ ಪ್ರೀತಿ-ಮನೆಗೆ

ಸುಸ್ವಾಗತ ಬರೆದಿಹುದು..!!




                                                                         -ನಿಮ್ಮ ಪ್ರೀತಿಯ,
                                                                            ಸಾವಿತ್ರಿ

Tuesday, February 12, 2013

ವರುಷದ ಹಿಂದೆ


 

                                   

ವರುಷದ ಹಿಂದೆ ,

ಸದ್ದಿಲ್ಲದೇ ನೀ ಬಂದೆ ..

ಪ್ರೀತಿಯ ಬೀಜವ ಮನದಲ್ಲಿ ಬಿತ್ತಿದೆ..!!!

೭ ಹೆಜ್ಜೆ,೩ ಗಂಟು,ಗಟ್ಟಿಮೇಳ,ಅಕ್ಷತೆ,

ಮಂಗಳಾಷ್ಟಕ,ಅರುಂಧತಿ ನಕ್ಷತ್ರ ,

ನಡುವೆ ಹೊಳೆಯುತ್ತಿತ್ತು ಪ್ರೀತಿ ರತ್ನ!!!

ಹಸಿರು ಗಾಜಿನ ಬಳೆಗಳ ಸದ್ದು,

ನೀ ನನ್ನ ಕೈ ಹಿಡಿದು,

ಸಪ್ತಪದಿ ತುಳಿವಾಗ ಪ್ರೀತಿಯೇ ಹಿರಿದು..!!!

ಗೃಹ ಪ್ರವೇಶ,ಮರು ದಿಬ್ಬಣ,ವರ-ಭೇಟಿ,

ಹನಿ ಮುನ್ನಾರ್,ಮೈಸೂರು - ಊಟಿ,

ಸಾಗಿದ್ದೆ ತಿಳಿಯಲಿಲ್ಲ ಒಂದು ವರ್ಷದ ಭರಾಟೆ..!!!

ನೂರು ಕನಸುಗಳ ಹೊತ್ತು,

ನನಸಾಗಿಸುತ್ತ ಸಾಗಿದೆ,ಬಾಳ ಗಮ್ಮತ್ತು,

ಹೀಗೆ ಸಾಗುತಿರಲಿ ಬಾಳ ನೌಕೆಯ ಮತ್ತು !!!

ನಾ ಬೇಡುವುದಿಷ್ಟೇ ದೇವರಲಿ,

ಸುಖವಿರಲಿ,ದುಃಖದಲಿ,

ಸಮಪಾಲು ನಮಗಿರಲಿ...!!!

ಕೂಡಿ ಬಾಳಿ,ಕೂಡಿ ಅಲೆ-

-ದು ,ಬಾಳ ನೌಕೆಯು ಸಾಗುತಿರಲಿ!!
 
 
-------ಚಿನ್ನು-----

 


 

 

 

 

 

ಮದುವೆ ವಾರ್ಷಿಕೋತ್ಸವದ ಸಂಭ್ರಮ


         

 

ಆತ : 'ಪ್ರೀತಿ' ಎಂದರೆ ನೀನೇ ಕಣೆ.

ಆಕೆ :ಪ್ರೀತಿಸಲು ಹೇಳಿಕೊಟ್ಟವನು ನೀನೇ ಅಲ್ಲವೇ.?!

ಆತ:'ಈ ಮೊದಲೇ ಯಾಕೆ ಸಿಗಲಿಲ್ಲ ನೀನು'.

ಆಕೆ: 'ಆವಾಗ ಮುಡಿಸಬೇಕೆಂದಿದ್ದ ಪ್ರೀತಿ ಹೂವನ್ನು ಈಗ ಮುಡಿಸಿ'.

ಆತ :ನಿನ್ನ ಇಷ್ಟು ಪ್ರೀತಿಗೆ ಏನು ಕೊಡಲಿ?!

ಆಕೆ:ನಿನ್ನ ಪ್ರೀತಿಗಿಂತ ಮಿಗಿಲಾದುದೇನಿದೆ ಗೆಳೆಯ!!

ಆತ:ಚಿನ್ನು!

ಆಕೆ:ಪುಟ್ಟು!!

ಪ್ರೀತಿಯಿಂದ ಎಲ್ಲರೆದುರಿಗೆ ಸವಿ, ರೀ ಎಂದು ಕರೆದುಕೊಳ್ಳುವ ಇವರಿಬ್ಬರೂ,ಏಕಾಂತದಲ್ಲಿ ಒಬ್ಬೊಬ್ಬರನ್ನು ಕರೆದುಕೊಳ್ಳುವ ಪ್ರೀತಿಯ ನಿಕ್-ನೇಮ್ ಗಳು ಬಹಳ.ಎಲ್ಲರಿಗೂ ಹೇಳುವಷ್ಟು ಸರಳವಲ್ಲವದು. ಇಬ್ಬರೂ ಈ ಶತಮಾನದ ಮುದ್ದಣ-ಮನೋರಮೆಯಂತಹವರು.

ಒಂದು ವರ್ಷದ ಹಿಂದೆ ,

ಹುಡುಗಿ:ಮಾತು ಬೆಳ್ಳಿ,ಮೌನ ಬಂಗಾರದಂತವಳು.

ಹುಡುಗ:ಮಾತಿನ ಮಲ್ಲ,ಬಂಡೆಗಲ್ಲನ್ನು ಮಾತನಾಡಿಸಿಕೊಂಡು ಬರುವವ.ಮೀನು,ಮಾಂಸ ತಿನ್ನುವುದರಲ್ಲಿ ಬೆಕ್ಕಿನಂತೆ.

ಹುಡುಗಿ:ಮಾರು ದೂರದಲ್ಲಿ ಮೀನು ಮಾರುಕಟ್ಟೆ ಇದ್ದಾರೆ ಮೂಗು ಮುಚ್ಚಿಕೊಳ್ಳುವವಳು.ರಾಗದ ಮಲ್ಲಿಯಂತೆ.

ಹುಡುಗ:ಪಾದರಸದಂತೆ.ನನ್ನವಳಿಗೆ ಚೆನ್ನಾಗಿ ಅಡಿಗೆ ಮಾಡಲು ಬಂದರೆ ಚೆನ್ನ.

ಹುಡುಗಿ:ಅಡುಗೆಯ ಅ ಆ ಇ ಬರದವಳು..!!...ತನ್ನದೇ ಪ್ರಪಂಚದಲ್ಲಿರುವವಳಾಕೆ!

ಹುಡುಗ:ಸದಾ ಜನರೊಂದಿಗೆ ಬೆರೆಯುವ ಜನಾನುರಾಗಿ!!

ಹುಡುಗ:ಕಾವ್ಯವೆಂದರೆ ಪ್ರಾಸ-ಅಲಂಕಾರಗಳ ಜೋಡಣೆ...ರಾಗ,ತಾಳ,ಭಾವಗಳ ಜೋಡಣೆ!!

ಹುಡುಗಿ:ಪ್ರಾಸ ಅದು ತ್ರಾಸ!!ಎಲ್ಲವೂ ಸ್ವತಂತ್ರ ಗೀತೆ ಯಾಕಾಗಬಾರದು!

ಎಣಿಸುತ್ತಾ ಹೋದರೆ ಭಿನ್ನ ವ್ಯಕ್ತಿತ್ವದ ಈ ಎರಡು ಹೃದಯಗಳನ್ನು ಆ ಬ್ರಹ್ಮ ಹೇಗೆ ಸೃಷ್ಟಿ ಮಾಡಿ,ಇಬ್ಬರನ್ನೂ ಹೀಗೆ ಸೇರಿಸಲು ಯೋಚಿಸಿದನೋ.ಇದೇ ಒಂದು ವರ್ಷದ ಹಿಂದೆ ತೀರ ಅಪರಿಚಿತರಾಗಿದ್ದ ಇವರಿಬ್ಬರೂ ಮದುವೆಯೆಂಬ ಪವಿತ್ರ ಬಂಧನದಲ್ಲಿ ಪ್ರೀತಿಯ ಏಳು ಹೆಜ್ಜೆಗಳನ್ನು ಜೊತೆಜೊತೆಯಲ್ಲಿತ್ತಿದ್ದು ಮೊನ್ನೆ ಮೊನ್ನೆಯಂತಿದೆ!

ಪ್ರೀತಿಯೆಂದರೆ ಸಮಾನ ಮನಗಳ ಮಿಲನವೇ ಆಗಬೇಕೆಂದಿಲ್ಲ.ಸಮಾನ ಮನಸುಗಳ ಜೊತೆಯಲಿ ಒಬ್ಬರಿಗೊಬ್ಬರು ಇನ್ನೊಬ್ಬರ ಅಭಿಪ್ರಾಯಗಳನ್ನು ಗೌರವಿಸುವ ಕಲೆ.ಆ ಕಲೆಯನು ಅರಿತು ಬಾಳಿ,ಪ್ರೀತಿ ಸ್ವರ್ಗವನ್ನು ಕಾಣುತಿಹರು.

ಆತ: ಈ ಬಾರಿ ನಮ್ಮ ಪ್ರೀತಿಯ ಹುಟ್ಟುಹಬ್ಬಕ್ಕೆ ಏನು ಉಡುಗೊರೆ ಕೊಡಲಿ ?

ಆಕೆ:ಅದೇ ಕಳೆದ ಬಾರಿ 'ಪ್ರೀತಿ ದಿನಾಚರಣೆ'ಗೆ ಕೊಟ್ಟ ಗುಲಾಬಿ.

ಆತ:ಅಷ್ಟೇ ಸಾಕೆ?ಇನ್ನೇನಾದರೂ ಕೇಳು! ಮುತ್ತಿನ ಹಾರ,ರೇಶ್ಮೆ ಸೀರೆ?!!

ಆಕೆ:ಪ್ರೀತಿಯ ಮುತ್ತಿನ ಹಾರ ಕೊಟ್ಟರೆ ಬೇಡ ಎಂದು ಯಾಕೆ ಹೇಳಲಿ!!

ಆತ:ಸಾಕು!ಸಾಕು!! ಪ್ರೀತಿಯಿಂದ ಊಟಕೆ ಬಡಿಸು!

ಆಕೆ:ಅಡಿಗೆ ಏನೂ ಮಾಡಿಲ್ಲ!!

ಆತ :ಇಷ್ಟೆಲ್ಲ ಮಾಡಿದ್ದಿಯಲ್ಲ?! ನೂರು ಜನರಿಗೆ ಕರೆದಿದ್ದಿಯೇನು ಊಟಕೆ!!

ಆಕೆ:ಪ್ರೀತಿಯಿಂದ ನಿಮಗಾಗಿ ಮಾಡಿದ್ದು!!ಸ್ವಲ್ಪ ಜಾಸ್ತಿಯಾಯ್ತು!!

ಅಯ್ಯೋ,ಎಷ್ಟು ಕೇಳ್ತಿರಾ?ಇವರ ಸಂಭಾಷಣೆ.ಕಿವಿ ಮುಚ್ಕೊಳ್ಳೋಣ.ಬಿಟ್ಟರೆ ಜೀವನವಿಡೀ ಮಾತನಾಡುತ್ತಾ ಕುಳಿತು ಬಿಡುತ್ತಾರೆ!

ಆಕೆ:ರೀ,ಈ ಹೆಸರು ಕರೆದು ಬೋರ್ ಬಂತು,ಏನಾದರೂ ಹೊಸ ತರಹ ಕರೀಲಾ?

ಆಟ:ಏನಾದರೂ ಕರಿ.ಹಾಂ!ಆ ಎರಡು ಹೆಸರು ಮಾತ್ರ ಬೇಡ.ಅದಕ್ಕೆ ಬೇರೆಯವರ ಹೆಸರಲ್ಲಿ ಪೇಟೆಂಟ್ ಇದೆ!!(ಆಕೆಗೆ ಆ ಹೆಸರೇ ಇಷ್ಟದಂತಿತ್ತು!!)

ಅಮ್ಮ,ಇನ್ನೂ ಕೇಳುತ್ತಾ ಇದೆ.ಅಬ್ಬಬ್ಬಾ ಪಚ್ಚೆ ಸೀರೆ,ಪಚ್ಚೆ ಬಳೆ ತೊಟ್ಟು ಅಮ್ಮಾವ್ರು ಗ್ರೀನ್ ಸಿಗ್ನಲ್ ಕೊಟ್ಟಿದ್ದೆ,ರಾಯರು ತಾಳಿ ಕಟ್ಟಿ,ಕರೆದುಕೊಂಡು ಬಂದಿದ್ದು ಇದೇ ೧ ವರ್ಷದ ಹಿಂದೆ ಫೆಬ್ರುವರಿ ೧೨ ರಂದು.

ಈಗ ಇಬ್ಬರದ್ದೂ ದಿನಾಲೂ ಪ್ರೀತಿ ರಾಗ,ಪ್ರೀತಿ ಉಸಿರು.ಪ್ರೀತಿಯಲ್ಲಿ ಮುಳುಗಿ ಬಿಟ್ಟಿದ್ದಾರೆ.ಪ್ರೀತಿಯಿಂದ ಆಕೆ ಇಷ್ಟದ ಜಾಮೂನು ಮಾಡಿ ಕಾಯ್ತಾ ಇದ್ದಾಳೆ ,ಸಾರು ಆಫೀಸಿನಿಂದ ಬಂದ ತಕ್ಷಣ ತಿನ್ನಿಸಿ,ಮೊದಲು ವಿಶ್ ಮಾಡಲು,ಅವನು ಮಾಡುವ ಮುಂಚೆ!!

ಹೀಗೆ ಸಾಗುತಿರುವ ಪ್ರೀತಿ ಜೀವನ ನೂರು ವರ್ಷ ಕಾಲ,ಪ್ರೀತಿಯಿಂದ ನಡೆದರೆ ಅಷ್ಟೇ ಸಾಕು.ದೇವರಲಿ ನಾ ಬೇಡಿಕೊಳ್ಳುವುದಿಷ್ಟೇ!!ಈ ಪ್ರೀತಿ ದಿನದಿ,ಪ್ರತಿ ದಿನದಿ.!!

ಪ್ರಿಯತಮ,ಸಂಗಾತಿ ,ಇನಿಯ .ಸ್ನೇಹಿತ ಇವೆಲ್ಲಕ್ಕಿಂತ ಮಿಗಿಲಾದ ನಿನ್ನ ಹೇಗೆ ಕರೆಯಲಿ ಚಿನ್ನ.ನಿನ್ನ ಪ್ರೀತಿಯ ಮಡಿಲಲಿ ಮಲಗಿ ಸದಾ ನಿನ್ನೊಂದಿಗೆ ಪ್ರೀತಿ ಸಂಭಾಷಣೆ ನಡೆಸುವಾಸೆ!

ಪ್ರೀತಿಯಿಂದ ಬರೆದಿದ್ದೇನೆ .ಪ್ರೀತಿಯಿಂದ ಓದಿ,ಪ್ರೀತಿಯಿಂದ ತಪ್ಪಿದ್ದರೆ ಕ್ಷಮಿಸಿ.

-ಇಂತಿ ನಿನ್ನ ಪ್ರೀತಿಯ ,
    ಚಿನ್ನು  
 

 

Monday, September 10, 2012

ರಾಜಾರಾಮ ಕಚೇರಿಯಿಂದ ಬಂದವನೇ ಎಂದಿನಂತೆ 'ಜಾನಕಿ,ಸ್ವಲ್ಪ ಚಹಾ ಮಾಡ್ತಿಯೇನೆ?','ಇವತ್ತು ಕಾಂತಿ ಸ್ವೀಟ್ಸ್ನಿಂದ ಜಿಲೇಬಿ,ಜಹಾಂಗೀರು ತಂದಿದ್ದೀನಿ ನೋಡೆ,ಮಕ್ಕಳಿಗೆಲ್ಲ ಕರೆದುಕೊಡೆ' ಎಂದು ಹೇಳಿ ಹೆಂಡತಿ ತಂದು ಕೊಟ್ಟ ಚಹಾ,ಶ್ಯಾವಿಗೆ ಉಪ್ಪಿಟ್ಟು ನಿಧಾನವಾಗಿ ಸವಿಯತೊಡಗಿದರು.ಜಾನಕಮ್ಮನವರು 'ಇವತ್ತು ಜಿಲೇಬಿ ತಿನ್ನಬೇಕೆಂದು ಬಹಳ ಅನ್ನಿಸ್ತಾ ಇತ್ತು,ಅದೇ ಹೇಗೆರೀ ನಿಮಗೆ ಗೊತ್ತಾಯ್ತು? 'ಎಂದು ಹೇಳಿ  ಮಗನನ್ನು ಕೂಗಿದಳು.




ಆಟ ಮುಗಿಸಿ ಅದೇ ತಾನೇ ಬಂದ ಗಗನ್ ಕೈ ಕಾಲು ತೊಳೆದು ತಂದೆಯೊಡನೆ ಕುಳಿತು ಇನ್ನೇನು ಇಲ್ಲಾ ಜಿಲೇಬಿಯನ್ನು ಮುಗಿಸುತ್ತಾನೆ ಎನ್ನುವಷ್ಟರಲ್ಲಿ 'ಅಕ್ಕಂಗೂ ಸ್ವಲ್ಪಾ ಇಡೋ' ಎಂದಳು ಅಮ್ಮ.ಇದನ್ನು ಕೇಳಿದ ರಾಜಾರಾಮ ಮಗಳೆಲ್ಲಿ,ಕಾಣಿಸ್ತಾ ಇಲ್ವಲ್ಲಾ ?,ಎಂದಾಗ 'ಇನ್ನೂ ಬಂದಿಲ್ಲಾರಿ,ಸ್ಪೆಷಲ್ ಕ್ಲಾಸ್ ಇರಬೇಕು,ಇತ್ತೀಚಿಗೆ ದಿನಾಲೂ ಸ್ಪೆಷಲ್ ಕ್ಲಾಸ್ ಇರುತ್ತೆ,ಎಂದರು ಜಾನಕಮ್ಮನವರು.

ದಿನಾಲೂ ರಾಜಾರಾಮ ಕಚೇರಿಯಿಂದ ಬರುವಷ್ಟರಲ್ಲಿ ಬರುತ್ತಿದ್ದ ರಾಧಾ ,ಇತ್ತೀಚಿಗೆ ಸ್ಪೆಷಲ್ ಕ್ಲಾಸ್ ಇದೆಯೆಂದು ತಡವಾಗಿ ಬರುತ್ತಿದ್ದಳು.ಬೆಳೆದ ಮಗಳಿಗೆ ಡಿಗ್ರಿ ಮುಗಿಯುತ್ತಿದ್ದಂತೆ ಆದಷ್ಟು ಬೇಗ ಮದುವೆ ಮಾಡಬೇಕು ,ದಿನೇ ದಿನೇ ವರದಕ್ಷಿಣೆ ಹೆಚ್ಚಾಗುತ್ತಿದೆ ,ಈ ಕಾಲದಲ್ಲಿ ಒಳ್ಳೆಯ ಹುಡುಗನನ್ನು ಹೇಗೆ ಹುಡುಕುವುದು ಎಂದೆಲ್ಲಾ ದಿನಾಲೂ ಯೋಚಿಸುತ್ತಿದ್ದರು.

ರಾತ್ರಿ ಎಂಟಾದರೂ ಬರದಿರುವುದನ್ನು ನೋಡಿ ತಂದೆಗೆ ಚಿಂತೆ ಹತ್ತಿತ್ತು.ಅದೂ ಒಂದತ್ತು ದಿನದಿಂದ ಇದೇ ರೀತಿ ತಡವಾಗಿ ಬರುವ ವಿಚಾರ ಕೇಳಿ ಇನ್ನೂ ಹೆದರಿತು ಮನ.ಬೆಳಿಗ್ಗೆ ಪೇಪರಿನವನು ಬರದಿದ್ದುದು ನೆನಪಾಯಿತು.ದಿನಾಲೂ ಬರುವ ಪೇಪರಿನವನ ಬದಲು ಇಂದು ಮತ್ತೊಬ್ಬ ಹುಡುಗ ಬಂದಿದ್ದ.ಈ ವಿಚಾರ ಬಂದೊಡನೆ ರಾಜಾರಾಮನ ಎದೆಬಡಿತ ಜಾಸ್ತಿಯಾಯಿತು.

ಆತನ ಮನಸ್ಸು ಅವನ ತಾರುಣ್ಯ ಕಾಲದತ್ತ ಸಾಗಿತ್ತು.ತುಂಬು ಬಡತನದ ಕುಟುಂಬ .ಇಬ್ಬರು ಅಕ್ಕಂದಿರು,ಇಬ್ಬರು ತಮ್ಮಂದಿರು ಇದ್ದ ಕುಟುಂಬ.ಓದುವ ಹಂಬಲ ಜಾಸ್ತಿ.ಪೇಪರ್ ಹಾಕುವುದು,ಸಂಜೆ ಗ್ಯಾರೇಜು ಕೆಲಸ ಹೀಗೆ ಕೆಲಸ ಮಾಡಿ ಆ ಹಣದಲ್ಲಿ ಫೀಸು ಕಟ್ಟುತ್ತಿದ್ದರು.

ದಿನಾಲೂ ಪೇಪರ್ ಹಾಕಲು ಹೋದಾಗ,ಜಾನಕಿ ಮುಂಜಾನೆದ್ದು ಅಂಗಳ ಗುಡಿಸಿ,ರಂಗೋಲಿ ಹಾಕಿರುತ್ತಿದ್ದಳು.ಮೊದಮೊದಲು ರಂಗೋಲಿ ನೋಡುತ್ತಿದ್ದ ರಾಮ್ ಸ್ವಲ್ಪೇ ದಿನದಲ್ಲಿ ಜಾನಕಿಯತ್ತ ಕಣ್ಣಾಯಿಸಿ,ಇಬ್ಬರ ನಡುವೆಯೂ ಪ್ರೇಮ ಅಂಕುರಿಸಿತು.

ಈ ವಿಷಯ ತಿಳಿದ ಜಾನಕಿ ಮನೆಯವರು ಅವರಿಬ್ಬರನ್ನು ಬೇರ್ಪಡಿಸಲು ಜಾನಕಿಗೆ ಬೇರೆ ಮದುವೆ ಮಾಡಲು ತಯಾರಿ ನಡೆಸಿದ್ದರು.ಇಬ್ಬರೂ ಮನೆ ಬಿಟ್ಟು ಓದಿ ಹೋಗಲು ನಿರ್ಧರಿಸಿ ಮಂಗಳೂರಿಗೆ ಬಂದು ಮದುವೆಯಾಗಿ ೨೫ ವರ್ಷ ಕಳೆದಿತ್ತು.



ತನ್ನ ಮಗಳ ಕತೆಯೂ ಹಿಗಾಯಿತೇನೋ ಎಂದು ಹೆದರಿದರು.
ಅಷ್ಟರಲ್ಲಿ ಮಗಳು ಬಂದು ಬಾಗಿಲು ಬಡಿದಳು.ದಿನಾಲೂ ಸ್ಪೆಷಲ್ ಕ್ಲಾಸ್ ಇರುತ್ತಿದ್ದು,ಇವತ್ತಿನ ಕ್ಲಾಸ್ ಇಲ್ಲವೆಂದು ತಿಳಿದ ತಕ್ಷಣ ಗೆಳತಿಯರೆಲ್ಲ ಸಿನಿಮಾ ನೋಡಲು ಒತ್ತಾಯಿಸಿ ಕರೆದುಕೊಂಡು ಹೋಗಿದ್ದರು.ಮುಂಜಾನೆ ಬಂದ ಬೇರೆ ಪೇಪರಿನವನ ಬಳಿ ಕೇಳಿದಾಗ ದಿನಾಲೂ ಬರುವ ಹುಡುಗನ ತಂದೆ ತೀರಿಕೊಂಡಿದ್ದರಿಂದ ಬರಲಿಲ್ಲವೆಂದು ಕೇಳಿ ರಾಜಾರಾಮರಿಗೆ ಬಹು ದುಃಖವಾಯಿತು....!!!!! 'ಜಾನಕಿ, ಚಹಾ ಮಾಡೆ' ಎಂದು ಹೆಂಡತಿಗೆ ಹೇಳಿದರು.

                                                                                                      -ಪಾರ್ಥವಿ











Friday, August 31, 2012

ನಮ್ಮೂರು



ಎಷ್ಟೋ ದಿನಗಳಾದವು.,ದಿನಗಳೇನು,ಬಹು ತಿಂಗಳಾದವೇನೋ  ಪೆನ್ನು ಹಿಡಿಯದೇ..!!ಗೆಳತಿ ಕಾವ್ಯಾಳನ್ನು ನೆನೆಯದೇ,ಅನೇಕ ದಿನಗಳಾದವು!ಋಷಿಕಾಗೆ,ಅಜ್ಜಿಗೆ ಅಷ್ಟೇಕೆ ಪುಟ್ಟುಗೆ ಪತ್ರ ಬರೆಯದೇ ಬಹು ದಿನಗಳಾದವು.

 ಈ  ಮುಂಚೆ  ಪತ್ರವೊಂದರಲ್ಲಿ ಪ್ರೇಮ ಪತ್ರ ,ಕಾವ್ಯ ಬರೆಯುವ ನಾನು ,ಪ್ರೀತಿಯ ಹುಟ್ಟೂರಿನ ಬಗ್ಗೆ ಒಮ್ಮೆಯೂ ಬ್ಲಾಗಿನಲ್ಲಿ ಬರೆದಿಲ್ಲವಲ್ಲ ಎಂದು ಕೇಳಿದ್ದೆ.ಇಂದು ಏಕೋ ಮನಸ್ಸು ನಮ್ಮೂರನ್ನು ಬಹು ನೆನೆಸಿತು.'ಜನನೀ  ಜನ್ಮಭೂಮಿಶ್ಚ ,ಸ್ವರ್ಗಾದಪಿ ಗರಿಯಸಿ'ಎಂಬಂತೆ ಎಲ್ಲೇ ಇರಲಿ ನಮ್ಮ ಊರಿನಲ್ಲಿ ಸಿಗೋ ಖುಷಿ ಮತ್ತೆಲ್ಲೂ ಸಿಗಲ್ಲ.

ನಮ್ಮೂರು 'ಶಿರಸಿ'.ಕರಾವಳಿ,ಮಲೆನಾಡು,ಬಯಲುಗಳಿಂದ ಕೂಡಿದ ಉತ್ತರಕನ್ನಡ ಜಿಲ್ಲೆಯ ಅತಿ ದೊಡ್ಡ ಊರೆನ್ನಬಹುದು.ಜಿಲ್ಲೆಯ 11 ತಾಲೂಕುಗಳಲ್ಲಿ ಶಿರಸಿಯೂ ಒಂದು.ಶಿರಸಿ ಎಂದರೆ ನೆನಪಾಗುವುದೇ ಶ್ರೀ ಮಾರಿಕಾಂಬಾ ದೇವಿ.








 
ಶಿರಸಿಯ ಗ್ರಾಮ ದೇವತೆ.ಶಿರಸಿಯ ಶ್ರೀಮಾರಿಕಾಂಬಾ  ಜಾತ್ರೆ ಕರ್ನಾಟಕದಲ್ಲೇ ಎರಡನೆ ಅತಿ ದೊಡ್ಡ ಜಾತ್ರೆ.(ಸಾಗರದ ಮಾರಿಕಾಂಬಾ ಜಾತ್ರೆ ಮೊದಲನೆಯದು ).ಮಾರ್ಚ್-ಎಪ್ರಿಲ್ ತಿಂಗಳಲ್ಲಿ ಎರಡು ವರ್ಷಗಳಿಗೊಮ್ಮೆ ನಡೆಯುವ ಜಾತ್ರೆಗೆ ಲಕ್ಷಾಂತರ ಮಂದಿ ದೂರದೂರದ ಊರಿಂದ ಬಂದು ತಾಯಿಯ ಆಶೀರ್ವಾದ ಪಡೆಯುತ್ತಾರೆ.
                                         
ಜನರ ಮುಖ್ಯ ಉದ್ಯೋಗ ವ್ಯವಸಾಯವೆನ್ನಬಹುದು.ಅಕ್ಕಿ ಮುಖ್ಯ ಬೆಳೆ.ಅಡಿಕೆ,ತೆಂಗು,ಬಾಳೆ,ಅಲ್ಲದೆ ಯಾಲಕ್ಕಿ,ಕಾಳು  ಮೆಣಸು ಇತ್ಯಾದಿ ಸಾಂಬಾರು ಪದಾರ್ಥಗಳಿಗೂ ಹೆಸರುವಾಸಿ ನಮ್ಮೂರು.

 ವಿದ್ಯಾಭ್ಯಾಸಕ್ಕಾಗಿ ಆವೆಮರಿಯಾ,ಮಾರಿಕಾಂಬಾ,ಎಂ.ಈ.ಎಸ್ ಮುಂತಾದ ಪ್ರಮುಖ ಶಾಲಾ-ಕಾಲೇಜುಗಳು ,ಅಲ್ಲದೆ ಕೃಷಿ ,ತೋಟಗಾರಿಕೆ ವಿಭಾಗಳಲ್ಲಿ ಉನ್ನತ ವ್ಯಾಸಂಗಕಾಗಿ ಕಾಲೇಜುಗಳು,ತಂತ್ರಜ್ಞಾನ,ವೈದ್ಯಕೀಯ ಇತ್ಯಾದಿ ವಿಷಯಗಳಲ್ಲಿ ಉನ್ನತ ಶಿಕ್ಷಣ ಪಡೆಯಲು ಧಾರವಾಡ,ಹುಬ್ಬಳ್ಳಿ ನಗರಗಳು ಬಹು ಹತ್ತಿರದಲ್ಲಿವೆ.
 


 ಬೇಡರ ವೇಷ, ಯಕ್ಷಗಾನ,ಭರತನಾಟ್ಯ ಮುಂತಾದ ಕಲೆಗಳಲ್ಲೂ ನಮ್ಮೂರವರು ಬಹು ಹೆಸರುವಾಸಿ.ಭಾಗವತರ ನಿರ್ದೇಶನ,ಚಂಡೆ,ಮದ್ದಳೆ ಯೊಂದಿಗೆ  ಹಿಮ್ಮೇಳದಲ್ಲಿ ,ಮುಮ್ಮೇಳದಲ್ಲಿ ಪಾತ್ರಧಾರಿಗಳೊಂದಿಗೆ ಸಾಮಾನ್ಯವಾಗಿ ರಾತ್ರಿ ಸಾಗುವ ಈ ಯಕ್ಷಗಾನ ಆಟಗಳಿಗೆ ಬಹು ವರ್ಷಗಳ ಹಿನ್ನೆಲೆಯಿದೆ.


ಅನೇಕ ದೇವಸ್ಥಾನ,ಚರ್ಚು,ಮಸೀದಿಗಳಿರುವ ಊರಲ್ಲಿ ಎಲ್ಲ ಶಿರಸಿವಾಸಿಗಳು 'ನಾವೆಲ್ಲರೂ ಒಂದೇ' ಎಂಬಂತೆ ಎಲ್ಲಾ

ಹಬ್ಬವನ್ನೂ 'ನಮ್ಮ ಹಬ್ಬ'ವೆಂಬಂತೆ ಬೇಧಭಾವವಿಲ್ಲದೇ ಆಚರಿಸುತ್ತಾರೆ.



'ಮುಸುಕಿನ ಬಾವಿ' ಶಿರಸಿಯ ಇನ್ನೊಂದು ಆಕರ್ಷಣೆ.ಹಿಂದೆ ಸೋಂದಾ ರಾಣಿ ಸುರಂಗ ಮಾರ್ಗದಿಂದ ಸ್ನಾನ ಮಾಡಲು ಬರುತ್ತಿದ್ದ ಕೊಳವದು.ಬಹು ವರ್ಷಗಳಿಂದ ಪಾಲು ಬಿದ್ದು ಯಾರಿಗೂ ತಿಳಿಯದಿದ್ದ ಪ್ರದೇಶವನ್ನು ಈಗ ಪುನರ್ ನಿರ್ಮಾಣ ಮಾಡಿ ,ಮಕ್ಕಳಿಗೆ ಆಟವಾಡಲು ಪುಟ್ಟ ಬಯಲನ್ನು ಮಾಡಿರಲು,ಸಂಜೆಯ ಸಮಯದಲ್ಲಿ 'ಮುಸುಕಿನ ಬಾವಿ'ಯ ಬಳಿ ಹೋದರೆ ದಣಿದ ಮನ ಉಲ್ಲಸಿತಗೊಂಡಿತು.




 


 









"ಮರುಜನ್ಮವೆಂಬುದಿರೆ ಮನುಷ್ಯನಾಗಿಯಲ್ಲದಿದ್ದರೂ,ಮರಿದುಂಬಿಯಾಗಿ ಈ ಮಣ್ಣಿನಲ್ಲಿ ಹುಟ್ಟಬೇಕು" ಎಂದು ಕವಿ ಪಂಪ ಬರೆದದ್ದು ಹಿಂದೆ ಕದಂಬರ ರಾಜಧಾನಿಯಾಗಿದ್ದ ಬನವಾಸಿಯ ಕುರಿತು. ಬನವಾಸಿ ಶಿರಸಿಯಿಂದ  ಕೇವಲ 23 ಕಿ.ಮೀ ದೂರದಲ್ಲಿದೆ.ಸಹಸ್ರಲಿಂಗ,ಯಾಣ,ಸೋಂದ,ಮಂಜುಗುಣಿ,ಇತ್ಯಾದಿ ಯಾತ್ರಾಸ್ಥಳಗಳೂ,ಮಾಗೋಡ,ಶಿವಗಂಗಾ,ಉಂಚಳ್ಳಿ,ಜೋಗ ,ಸಾತೊಡ್ಡಿಯಂಥ ಜಲಪಾತಗಳೂ ಶಿರಸಿಯಿಂದ ಬಹು ಹತ್ತಿರದಲ್ಲಿವೆ.

ಬಹು ಚಳಿಯೂ ಅಲ್ಲದ,ಬಹು ಬಿಸಿಲ ಬೇಗೆಯೂ ಅಲ್ಲದ ಬೆಚ್ಚನೆಯ ವಾತಾವರಣ ಯಾರನ್ನಾದರೂ ಶಿರಸಿಯತ್ತ ಧಾವಿಸುವಂತೆ ಮಾಡುತ್ತದೆ.ನೀವೂ ಶಿರಸಿಗೆ ಬೇಗ ಬಂದು ಶಿರಸಿಯ ವಿಹಂಗಮ ನೋಟ ವನ್ನು ನೋಡಿ ಸವಿಯಿರಿ.ಸುಸ್ವಾಗತವು ನಿಮಗೆ.

 

Monday, August 20, 2012

ಚಿತ್ರಾಯಣ





ನನ್ನ ನಲ್ಮೆಯ ಹಿರೋ ,
             ಮದುವೆಯಾಗಿ ಹೊಸ ಮನೆಗೆ ಹೊಸ ಸಾಮಾನು ಖರೀದಿಸಿ-ಜೋಡಿಸಿ,ಮಾಡುವುದರೊಳಗೆ  ಸ್ವಲ್ಪ ದಿನಗಳು ಕಳೆದವು.ಈ  ನಡುವೆ ಹೇಗಾದರೂ ಮಾಡಿ ಸಿನಿಮಾ ನೋಡಬೇಕೆಂದು 'ದಮ್ಮು' ನೋಡಿ ಬಂದೆವು.



  ಈ  ನಂತರ 'ಶಗುನಿ','ಕಟಾರಿವೀರ ಸುರ ಸುಂದರಾಂಗಿ' ಹೀಗೆಲ್ಲಾ ವಾರಾಂತ್ಯದಲ್ಲಿ ಅನೇಕ  ಸಿನಿಮಾಗಳನ್ನು
ನೋಡಿದ್ದೆವು.  ವಾರಾಂತ್ಯದಲ್ಲಿ ಕೆಲವೊಮ್ಮೆ ಆಫೀಸ ಕೆಲಸ ಇರುವುದರಿಂದ ಬೇರೆ ದಿನಗಳಲ್ಲಿ ಆಫೀಸು ಮುಗಿದ ನಂತರ ಹೋಗೋಣವೆಂದು ಪ್ಲಾನ್ ಮಾಡಿದ ದಿನಗಳೂ ಇವೆ.ಹಲವಾರು ಬಾರಿ ಆಫೀಸಿನಲ್ಲಿ ತುಂಬಾ ಕೆಲಸ ಇರುವುದರಿಂದ ಅದನ್ನು ಮುಂದೂಡಬೇಕಾಗಿದ್ದವು.



    ಒಮ್ಮೆ ರಾತ್ರಿ ಕೆಲಸವಿದೆ ಎಂದು ಬೇಗ ಮನೆಗೆ ವಿಶ್ರಾಂತಿಗೆಂದು ಆಫೀಸಿನಿಂದ ಮರಳುತ್ತಾ,ನಂತರ ಆ ದಿನ ಕೆಲಸವಿಲ್ಲವೆಂದು ತಿಳಿದು 'ಅಣ್ಣ ಬಾಂಡ್ ' ಸಿನಿಮಾ ಟಿಕೆಟ್ ತೆಗೆದುಕೊಂಡು ನನಗಾಗಿ ಕಾದಿದ್ದೆ.



'ಕಹಾನೀ' ನೋಡಬೇಕೆಂದುಕೊಂಡು,ಆದರೆ ಆ ವಾರಾಂತ್ಯದಲ್ಲಿ ನಾವು ಊರಿಗೆ ಹೋಗಿ,ಇನ್ನೊಂದು ವಾರಾಂತ್ಯ ಕೆಲಸ ಎನ್ನುವುದರೊಳಗೆ ಚಿತ್ರವನ್ನು ನೋಡಲಾಗಲಿಲ್ಲ.ಗೆಳತಿ ಚಿತ್ರಾಳ ಬಳಿ ಪೆನ್ ಡ್ರೈವ್ ನಲ್ಲಿ ಪಡೆದು ನೋಡಲು,ಪ್ರಿಂಟ್ ಚೆನ್ನಾಗಿಲ್ಲ ಎಂದು ನೋಡಿರಲಿಲ್ಲ.ಎರಡು ದಿನದ,ಹಿಂದೆ ಟಿ.ವಿ.ಯಲ್ಲಿ ನೋಡಿ  ಅಂತೂ ಚಿತ್ರ 'ಕಹಾನೀ' ಮುಗಿಯಿತು!!!


ಬಂದ ಮೊದಲ ವಾರವೇ 'ಈಗ' ಚಿತ್ರ ನೋಡಿದ ನಾವು,ಊರಿಗೆ ಹೋಗಲು ಅಣ್ಣನವರಿಗೆ ಚಿತ್ರ ನೋಡಿರೆಂದು ಶಿಫಾರಸ್ಸು ಮಾಡುತಿರಲು,ಅವರೂ ನಮ್ಮನ್ನು ಕರೆಯಲು ಮತ್ತೊಮ್ಮೆ ನೋಡಿದೆವು.ಅಲ್ಲದೆ ಗೆಳೆಯನಿಗೆ ಆ ಚಿತ್ರ ತೋರಿಸಬೇಕೆಂದು,ಅಂತೂ ಇಂತೂ ಮೂರು ಬಾರಿ 'ಈಗ' ನೋಡಿದೆವು.ಗೊತ್ತಿಲ್ಲ,ನಾಳೆ ಇನ್ನ್ಯಾರಿಗಾದರೂ ಕಂಪನಿ ಕೊಡಲು,ಅವರೊಂದಿಗೆ ಹೋಗಬಹುದು!!ನಮ್ಮಿಬ್ಬರಿಗೂ ಅಷ್ಟುಇಷ್ಟವಾಗಿರಬೇಕು,ಈ  ಚಿತ್ರ.


ಕಳೆದವಾರ 'ಜುಲಾಯಿ' ಚಿತ್ರ ನೋಡಬೇಕೆಂದು ನನ್ನ ಆಫೀಸ ಮುಗಿದ  ನಂತರ ನನಗೆ ಚಿತ್ರ ಮಂದಿರದ
ಬಳಿ ಹೋಗಿ ಟಿಕೆಟ್ ಕೊಳ್ಳಲು  ಹೇಳಿ ,ಇನ್ನೇನು ಚಿತ್ರ ಶುರುವಾಗ  ಎರಡು ನಿಮಿಷ ಮುಂಚೆ  ಬಂದಿದ್ದೆ.ಬಸ್ಸಿನಲ್ಲಿ ಕುಳಿತು ಬರಲಾಗುತ್ತೋ ಇಲ್ಲವೋ ಎಂಬ ಯೋಚನೆ ಆಗಿತ್ತು ನಿನಗೆ.ಮಾರನೇ  ದಿನ ಮತ್ತೆ ಗೆಳೆಯರೊಂದಿಗೆ 'ಈಗ' , ಸಂಜೆ
'ಐಸ್  ಏಜ್ 4',ರಾತ್ರಿ ಟಿ.ವಿ.ಯಲ್ಲಿ 'ವೆಡ್ ನೆಸ್ ಡೇ '.ಹೀಗೆ 24 ತಾಸಿನಲ್ಲಿ 4 ಸಿನಿಮಾ ನೋಡಿದ್ದೆವು.


          ಹೀಗೆ ಚಿತ್ರಾಯಣ ನಡೆಯುತ್ತಿರಲು,ಇಂದು ಇನ್ನೊಂದು ಸಿನಿಮಾ ನೋಡೋಣ ಎಂದಿರುವೆ.ಕಾಯುತ್ತಿದ್ದೀನಿ ನಿನ್ನ ಬರುವಿಗಾಗಿ,ಸಿನಿಮಾಗಾಗಿಯಲ್ಲ!!
       
                                                                                -ಇಂತಿ ನಿನ್ನ ಪ್ರೀತಿಯ,
                                                                                     ಚಿನ್ನು



   

ನಮ್ಮ ಮನೆ -ಅಡುಗೆ ಕಥೆ


ನಲ್ಮೆಯ ಪುಟ್ಟು ,

      ಅಯ್ಯೋ?! ಗೌರವ ಕೊಟ್ಟು ರೀ ಅಂತಿಲ್ಲ, ಅಂತ ಆಶ್ಚರ್ಯ ಪಡ್ತಿದಿಯಾ ? ಎಷ್ಟಂದರೂ ನೀನು ನನ್ನ ಪುಟ್ಟುನೇ ಆಲ್ವಾ,ಕರೆದರೆ ಏನೂ ತಪ್ಪಿಲ್ಲಾ ಅನ್ಕೊತೀನಿ.
 
      ಮದುವೆ   ಆದ ಹೊಸತರಲ್ಲಿ ನಾವಿಬ್ಬರೂ ಅಡಿಗೆಯಲ್ಲಿ ಎಲ್ ಬೋರ್ಡು.ಮಾಡಲು ಬರುತ್ತಿದ್ದುದು ಅನ್ನ ,ಬೇಳೆಸಾರು.ಮದುವೆಯಾಗಿ ಈ  ಮನೆಗೆ ಬಂದ ಮೊದಲ ದಿನಗಳಲ್ಲಿ ,ಅಡಿಗೆ ಸಾಮಾನಿಲ್ಲದೆ,ದಿನಾಲೂ ಎಸ್ .ಎಲ್ .ವಿ (ಹೋಟೆಲ್ ) ಊಟ .ಆ ಹೋಟೆಲ್ ಉದ್ಯೋಗಿಗಳೆಲ್ಲ ನಮ್ಮ ಊರಿನವರೆಂದು,ಅವರೊಂದಿಗೆ ಚೆನ್ನಾಗಿ ಹರಟೆ ಹೊಡೆದು ಬಂದಿದ್ದೆವು.

           ಗ್ಯಾಸ್ ಕನೆಕ್ಷನ್ಗಾಗಿ ವಿಚಾರಿಸಿ ಸೋತು ,ಎಲ್ಲಾ ಗೆಳೆಯರ ಬಹುಮತಾಭಿಪ್ರಾಯದಿಂದ  ಇಂಡಕ್ಷನ್ -ಸ್ಟೋವ್
 ಕೊಂಡು ತಂದು,ತಂದ ದಿನವೇ ಹಾಲುಕ್ಕಿಸಿ (ಹಾಲುಕ್ಕಿಸುವ ಶಾಸ್ತ್ರ ಮುಗಿದಿದ್ದರೂ ), ಅನ್ನ, ಬೇಳೆಸಾರು ಮಾಡಿ ಊಟ
 ಮಾಡಿದ್ದೆವು .ನೆಂಚಿಕೊಳ್ಳಲು ಉಪ್ಪಿನಕಾಯಿ ತರಲು ನಾವು ಮರೆತಿರಲಿಲ್ಲ .ಮಾರನೆ ದಿನವೇ ಸರ್ಪ್ರೈಸ್ ನೀಡಲೆಂದು
 ನಾ   ಮಾಡಿದ ಗುಲಾಬ್ ಜಾಮೂನು.ಅದಕ್ಕೆ ಮಾಡಿದ ಜಾಸ್ತಿ ಪಾಕ ಇನ್ನೆರಡು ದಿನದಲ್ಲಿ ಮತ್ತೆ ಜಾಮೂನು
 ತಯಾರಿಸುವಂತಾಯಿತು.




         ಅಮ್ಮನಿಗೆ  ಫೋನಾಯಿಸಿ ಒಂದೊದಾಗಿ ಅಡಿಗೆ ಮಾಡಿ,ದಿನಾಲೂ ನಮ್ಮ ಮನೆಯಲ್ಲಿ ಹೊಸ ರುಚಿ .
  "ಅಮ್ಮಾ ,ದಿಡೀರ್  ಅಂತ ಹತ್ತೇ ನಿಮಿಷದಲ್ಲಿ ಮಾಡುತ್ತಿದ್ದಿಯಲ್ಲ, ಆ ಸಾರು  ಹೇಗೆ ಮಾಡುತ್ತಿ ??!!! ಅತ್ತಿಗೆ,  ಒಡೆದ ಹಾಲಿನಿಂದ ಸಿಹಿ ತಿನಿಸು  ಹೇಗೆ ಮಾಡುವುದು.ಅತ್ತೆ ಆ ಕಾಳಿನ ಸಾರು ಹೇಗೆ ಮಾಡುತ್ತಿ ?ಎಂದೆಲ್ಲ ಇಬ್ಬರೂ    ಫೋನಾಯಿಸುವುದೇ ದಿನಚರಿಯಾಗಿದ್ದವು.



        ಊರಿಗೆ ಹೋದರೂ "ಅಮ್ಮಾ ,ಈ ಪಲಾವ್ ಹೇಗೆ ಮಾಡಿದಿರಿ ??","ಬೇಳೆ ಸಾರು ಇಷ್ಟು ಚೆನ್ನಗಾಗಲು ಏನು
 ಮಾಡಬೇಕು"."ಈ  ಸಾರಿಗೆ ಯಾವ ಒಗ್ಗರಣೆ ಉತ್ತಮ " ಹೀಗೆಲ್ಲ  ನೂರಾರು ಪ್ರಶ್ನೆಗಳೊಂದಿಗೆ ಶುರುವಾಯಿತು ನಮ್ಮ ಮನೆ ಅಡುಗೆ ಕಥೆ.    

       ಪ್ರತಿ ವಾರಾಂತ್ಯದಲ್ಲಿ ನೆಂಟರನ್ನು,ಗೆಳೆಯ-ಗೆಳತಿಯನ್ನೆಲ್ಲ ಕರೆದು ಎಲ್ಲಾ ಸೇರಿ ಅಡಿಗೆ ಮಾಡಿ ಎಲ್ಲರೂ ಆಟವಾಡುತ್ತಾ ಸಮಯ ಕಳೆಯುತ್ತಿದ್ದವು.ಮೊದಮೊದಲು ಮಾಡುತ್ತಿದ್ದುದ್ದು ಅನ್ನ,ಬೇಳೆಸಾರು ,ಸಾಂಬಾರು ,ಕೋಸಂಬರಿ .ಮನೆಗೆ ಯಾರು ಬಂದರೂ ಅದನ್ನೇ ಮಾಡಿ ಬಡಿಸುತ್ತಿದ್ದುದು.ನಂತರ ನಿಧಾನವಾಗಿ ಕಾಳು ಪಲ್ಯ,ಬಜ್ಜಿ,ಶ್ಯಾವಿಗೆ ಪಾಯಸ ಇತ್ಯಾದಿಗಳನ್ನೂ ಮಾಡತೊಡಗಿ ಇತರೆ ಸಿಹಿತಿನಿಸುಗಳನ್ನೂ ಮಾಡುತ್ತಿದ್ದೇವೆ.

     ನಮ್ಮಿಬ್ಬರಿಗೆ ಮಾತ್ರ ಅಡಿಗೆ ಮಾಡುವಾಗ ಸರಿಯಾಗಿ ಆದರೂ,ಇನ್ಯಾರಾದರೂ ಬರುತ್ತಾರೆ ಎಂದರೆ ಟೆನ್ಷನಲ್ಲಿ ಏನಾದರೂ ಹೆಚ್ಚು ಕಡಿಮೆ ಆಗುತ್ತಿದ್ದವು.ಅಣ್ಣ ಸ್ವಲ್ಪ ಮೆತ್ತಗಾಗುವುದು,ಸಾಂಬಾರಿನಲ್ಲಿ ಯಾವುದಾದರೂ ತರಕಾರಿ
ಬೇಯದಿರುವುದು,ಹೀಗೆಲ್ಲ.ಆದರೂ ಅದನ್ನು ಬಿಡದೇ ಮೆತ್ತಗಾದ ಅನ್ನ ಒಗ್ಗರಣೆ ಹಾಕಿ ಮೊಸರು ಬೆರೆಸಿ ಮೊಸರನ್ನ ಮಾಡಿ ಗೆಳೆಯರೆಲ್ಲರೂ ಚಪ್ಪರಿಸಿ ತಿನ್ನುವಂಥ ಉಪಾಯಕ್ಕೆ ತಲೆದೂಗಲೇ ಬೇಕು!


   ಸ್ವಲ್ಪ ದಿನಗಳ ಹಿಂದೆ ಆಫೀಸಿನಲ್ಲಿ 'ಪೊಟ್ ಲಕ್ ' (ನಾವೇ ,ನಮ್ಮ ಕೈಯ್ಯಾರೆ  ಅಡುಗೆ ಮಾಡಿ,ಎಲ್ಲರೂ ಕುಳಿತು ಒಟ್ಟಿಗೆ ಊಟ ಮಾಡುವುದು.) ಇದ್ದಾಗ ಏನು ಅಡುಗೆ ಮಾಡುವುದು ಎಂಬ ತಳಮಳದಲ್ಲಿರಲು,ಬಟಾಟೆ ಪಲ್ಯ,ಶ್ಯಾವಿಗೆ ಪಾಯಸ ಮಾಡುವ ಉಪಾಯ ಹೇಳಿ ಇಬ್ಬರೂ ಸೇರಿ ಮಾಡಿದ ಪಲ್ಯ ಮತ್ತು ಪಾಯಸ ಬಲು ಚೆನ್ನಾಗಿತ್ತು.



   ಇವೆಲ್ಲಾ ನಾವು ಮಾತನಾಡಿಕೊಳ್ಳಬಹುದು,ಆದರೆ ಅವು ಪತ್ರ ಬರೆದು ಹೇಳಿದಷ್ಟು ರಸಪೂರಿತವಾಗಿರಲ್ಲ .ಹೀಗಿದೆ,ನಮ್ಮ ಅಡುಗೆ ಮನೆ ಕಥೆ.ಪತ್ರದಲ್ಲಿರೋ ಮಜಾನೇ  ಬೇರೆ. ಪತ್ರ ಬರೆದ್ರೆ ,ಓದಿದರೆ ಒಳ್ಳೆ

ಕಳಿತ ಮಾವಿನ ಹಣ್ಣಿನ ರಸಾಯನ ಮಾಡಿ ತಿಂದ ಹಾಗಿರುತ್ತೆ .'ಸರಿ ಅಡಿಗೆ ಆಗಿದೆ'.ನಿಮ್ಮಿಷ್ಟದ ಬೇಳೆಸಾರು,ಬದನೇಕಾಯಿ ಬಜ್ಜಿ ಮಾಡಿದ್ದೀನಿ ,ಊಟಕ್ಕೆ ಬನ್ನಿ ....!!!!

                                                                           -ಇಂತಿ ನಿನ್ನ  ಪ್ರೀತಿಯ ,
                                                                                ಚಿನ್ನು